ESPERANSA NE'EBÉ LAKON

Kakutak lori hanoin hodi hatete sai iha ibun

Fuan hodi sente hanoin ne'ebé hanoin iha kakutak
Liman hodi hakerek hanoin iha sura-tahan
Matan lori haree hanoin ne'ebé hakerek iha sura-tahan

Liman hahú hakerek esperansa moris nian ne'ebé mihis ba beibeik
Hakerek ho lapís ida iha sura-tahan mehi nian nia leten
Fuan hetok la hakmatek no lakon espetativa
Matan hahú lu'ut matabeen
Hela de'it mehi ne'ebé hakerek hela iha sura-tahan mehi nian
Kleur la'o no letra hahú malahuk
Bainhira hateke fila letra la iha ona nia fatin

Dúvidas mosu? Se los mak hamoos letra sira ne'e
Sura-tahan mehi nian mamuk la iha tan letra
Lalatak mós la haree hetan
Hahú hakerek foun
Hakerek ba hakerek la hanesan uluk
Risku ba risku mós la iha ona hun no rohan

Neon hahú taridu no fuan hahú sente
Matan hahú lu'ut matabeen no kakutak hahú buradu
Bainhira la hetan esperansa moris nian iha sura-tahan mehi nian
Hahú mehi fali mehi ne'ebé aas tebe-tebes hanesan lalehan ne'ebé aas
Hodi kaer-toman fali esperansa moris nian ne'ebé mihis ba beibeik

Dili, 26 Dezembru 2018

Amandio Lopes