------------Ohin---------------
Ó husik hela memória ne'ebé furak
Ó husik hela istória ne'ebé naruk
Atu ami hotu, Ó-nia jerasaun;
Bele hatutan
Bele haburas
Bele haberan
Bele haroman, istória ne'ebé Ó halo ona
-Rama-Metan-
Ó mak hali hun no abut
Ba sanak oan sira
Hodi fó mahon
Ba ema hirak ne'ebé
Husik hela sira-nia knua
Mai hamutuk ho Ita
Hodi tetu hamutuk lia
Ó-nia naran ami sei temin
Hosi jerasaun ba jerasaun
No sei la lakon hosi otas ba otas
-Rama-Metan-
Husi fatin ne'ébé Ó horik ba;
Sei hamaluk nafatin ami
Sei hawelok nafatin ami
Sei hamahan nafatin ami
Sei haroman nafatin ami
Sei haburas nafatin ami
Iha dalan ne'ebé ami la'o ba
Iha uma ne'ebé ami horik ba
-Rama-Metan-
Ó-nia memória
Sei horik nafatin iha ami fuan
Ó mak uluk
Ó mak agora
Ó sei nafatin
Hosi tinan ba tinan
-Rama-Metan-
Ó-nia espirítu sei hela ho ami
Uluk Rama-Metan
Agora Rama-Metan
Aban Rama-Metan
Rama-Metan sei eziste nafatin
-Rama-Metan-
Ó erói duni
Ó Maubere duni
Ó mak tabaku batar kulit
Ó mak sanan-rai
Ó mak kulit rai na'in
Ó mak loriku ne'ebé la sikat subar
Ó sai edukadór ida
Ba otas nurak sira
-Rama-Metan-
Ohin família tomak triste
Ohin povu tomak triste
Tamba .......
Lakon ema di'ak ida
Lakon enfermeiru di'ak ida
Lakon mestre di'ak ida
Lakon mós Maubere ain-tanan nia oan ida
Lakon mós oan ki'ak sira-nia aman Lakon mós mestre Rezisténsia ida
-Rama-Metan-
Ó mate iha Maubere nia rain
Ó i'is kotu besik Ó-nia emar sira
Ó mate ho ibun di'ak
Ó mate halo ema hotu triste
Ó mate halakon ema hotu nia esperansa
Timor lakon nia ema di'ak ida, Maubere puru
Dukur ho silénsiu
Nakukun ho malirin
Hako'ak dadauk
Iha toba fatin
Laletek Atsabe
No lidun sidade Dili
Fihir Ó hodi
Hamout ona alegria
Hatúr mós domin mata-wen
RIP mestri ba Rezisténsia
----------------------&----------------------
Dili, 6 Setembru 2019
Hakerek na'in: Konis Maubere
0 Comentários